Job 19

Impendulo kaJobe

1 Wasephendula uJobe wathi:

2 “Koze kube nini lilokhu lingichukuluza, lingihlifiza ngamazwi na?

3 Selingithethise izibanga ezilitshumi manje; lingihlasela lingelanhloni.

4 Nxa kuliqiniso ukuthi ngiphambukile, isiphambeko sami ngumlandu wami ngedwa.

5 Nxa isibili liziphakamisa ngaphezulu kwami, lingicindezele ngokuyangeka kwami,

6 lapho yazini ukuthi uNkulunkulu ungonile wangithandela ngamambule akhe.

7 “Loba ngingaze ngikhale ngithi, ‘Ngoniwe bo!’ angitholi mpendulo; loba ngicela uncedo, kangahlulelwa kuhle.

8 Uyivalile indlela yami akudluleki; izindlela zami uzembese ngomnyama.

9 Usengiphucile konke ukuhlonitshwa wangethula umqhele ekhanda lami.

10 Ungidabula inxa zonke ngize ngiphele du; usiphuna ithemba lami njengesihlahla.

11 Ulaka lwakhe luyavutha kimi; ungibalela phakathi kwezitha zakhe.

12 Amabutho akhe athela ngezinkani; angakhela isihonqo sokungivimbezela akanisa egqagqele ithente lami.

13 “Usenze abafowethu bangihlamuka; abangane bami kabasanamathelani lami.

14 Izihlobo zami sezihambile; abangane bami sebekhohliwe ngami.

15 Izethekeli zami lezincekukazi zami zithi ngingowemzini; zingikhangela njengesizwe.

16 Ngithi nxa ngibiza isisebenzi sami singasabeli, lokuba ngisincenga ngomlomo wami.

17 Ukuphefumula kwami kuyamnukela umkami; ngiyenyanyeka kubafowethu.

18 Labafanyana bayangiklolodela; ngithi nxa ngiqhamuka bangihoze.

19 Bonke abangane bami abasekhwapheni bayanengeka ngami; labo engibathandayo sebengifulathele.

20 Angiselalutho ngaphandle kwesikhumba lamathambo kuphela; ngisile manayinayi.

21 “Ngizwelani usizi, bangane bami, wobani losizi, ngoba isandla sikaNkulunkulu singitshayile.

22 Lingilandelelani njengoNkulunkulu na? Lizakufa lasutha ngenyama yami na?

23 “He, uthi ngabe amazwi ami ayalotshwa, ngabe abhaliwe emqulwini,

24 ngabe athwetshulwe ngensimbi phezu komnusu, loba agujiwe edwaleni lanininini!

25 Ngiyazi ukuthi uMhlengi wami uyaphila, lokuthi ekupheleni uzakuma emhlabeni.

26 Kuzakuthi nxa isikhumba sami sesibhujisiwe, kodwa ngikuyo inyama yami ngizambona uNkulunkulu;

27 mina ngokwami ngizambona ngawami amehlo – mina, hatshi omunye. Inhliziyo yami iyagubhazela ngokulangatha!

28 “Lingaze lithi, ‘Sizamzingela qho ngoba nguye ozilethele ukuhlupheka;’

29 yini okumele liyesabe inkemba; ngokuba intukuthelo izaletha isijeziso ngenkemba, ngakho-ke lizakwazi ukuthi kulokwahlulela.”